Wednesday, March 25, 2009

7.ജ്യോതിര്‍മയി ശങ്കരന്‍

ജ്യോതിര്‍മയമായ കാവ്യസൌന്ദര്യം തുളുമ്പുന്ന ഒട്ടേറെ കവിതകളുള്ള ഒരു ബ്ലോഗാണിത്. കവയത്രി ഇനിയും ഒരുപാട്‌ യാത്ര ചെയ്യേണ്ടിയിരിക്കുന്നു എന്നത് സത്യമെങ്കിലും എത്തി നില്‍ക്കുന്ന ദൂരം മനോഹാരിതക്ക് ഒട്ടും കുറവില്ലാത്ത വസന്തഭൂമി തന്നെയെന്നതില്‍ സംശയമില്ല. പല കവിതകളിലൂടെയും കടന്നു പോകുമ്പോള്‍, ഒരു മനസ്സു വായിച്ചറിയുന്ന അനുഭവമാണ് ജ്യോതിര്‍മയം അനുവാചകനു നല്‍കുന്നത്. പലതും ജീവിത ഗന്ധിയായ, ജീവനുള്ള വരികള്‍. സ്വാനുഭവങ്ങളുടെ നേര്‍ക്കാഴ്ചകളാണോ എന്ന് സംശയിപ്പിക്കുന്ന പല വരികളും സൂക്ഷ്മവായനയില്‍ ഗ്രഹിച്ചെടുക്കാം. എന്നിരുന്നാലും വാരിവലിച്ച്, ചവറുകളാക്കാതെ പദഭംഗികൊണ്ട്‌ അലങ്കരിച്ച് അവതരിപ്പിച്ചിരിക്കുന്നത് കവയത്രിയുടെ സര്‍ഗ്ഗാത്മകതയുടെ ഉദാഹരണമായി എടുത്തു കാട്ടാവുന്നതാണ്.


പുരാണ-ചരിത്ര കഥാഖ്യായികളായ ചില കവിതകള്‍ - ഇതെഴുതാന്‍-ഇങ്ങനെയെഴുതാന്‍- ഈ കാലഘട്ടത്തില്‍ ഒരാള്‍ എന്ന അത്ഭുതം നമ്മില്‍ ജനിപ്പിച്ചേക്കം. കവിതയുടെ ശാസ്ത്രീയമായ ചട്ടക്കൂടുകളോ, അവതരണമികവോ അല്ല, ഇത്തരമൊരു വിഷയത്തിലേക്ക് ശ്രദ്ധ പതിപ്പിക്കുവാനും, ഭംഗിയായി തന്നെ അതിനെ അവതരിപ്പിക്കുവാനുള്ള ശ്രമം അത്‌ ആദരണീയവും, അഭിനന്ദനീയവുമത്രേ.


തീവണ്ടിയാത്രയില്‍ എന്ന കവിത, ഒരു ചിത്രം കാണുന്നതുപോലെ വായിച്ചെടുക്കാന്‍ കഴിയുന്നുണ്ട്‌.


ഊര്‍മ്മിള, ജീവിതയാത്ര, പ്രണയ ദിനത്തില്‍ തുടങ്ങിയ കവിതകള്‍ പല തലത്തിലുള്ള വായന അര്‍ഹിക്കുന്നു എന്നു തോന്നുന്നു. വിശിഷ്യാ പ്രണയദിനത്തില്‍ എന്ന കവിത ശിഥിലവും അര്‍ത്ഥശൂന്യവുമാകുന്ന സ്നേഹബന്ധങ്ങള്‍ക്കും, കടല്‍കടന്നെത്തുന്ന ഏതൊരു സംസ്കാരത്തെയും കീഴ്മേല്‍ നോക്കാതെ നെഞ്ചേറ്റു വാങ്ങുന്ന ഒരു വിഭാഗം ജനതയുടെയും മേല്‍ പ്രഹരമേല്‍‍പ്പിക്കാന്‍ പോന്ന ഊര്‍ജ്ജമുള്‍ക്കൊള്ളുന്നവയാണ്. എന്നാല്‍ ഈ കവിതയിലൂടെ കവയത്രി പറഞ്ഞു വച്ച കാര്യങ്ങള്‍ക്ക് ശക്തി പോര എന്നും അനുഭവപ്പെട്ടു. കവിതയുടെ ഊര്‍ജ്ജപ്രവാഹത്തിന് വാക്കുകളുടെ ദൌര്‍ബല്യം തടസ്സമാകുന്നുവെന്ന് അനുഭവപ്പെട്ടു.


ജ്യോതിര്‍മയത്തിലെ യാത്രാക്കുറിപ്പുകള്‍ തുടങ്ങിയ ഇതര സൃഷ്ടികളോട്‌ അത്ര മമത തോന്നിയില്ല എങ്കിലും ശ്രമം പ്രശംസനീയം തന്നെ.


ജ്യോതിര്‍മയത്തില്‍ എന്നെ വളരെ ആകര്‍ഷിച്ച ഒരു കവിതയാണ് ദുഃഖ ജല്‍‍പനങ്ങള്‍ എന്ന കവിത.


എവിടെയോ കൊത്തിവലിയ്ക്കുന്നിതെന്‍ മന-
മൊരുപാടു സഞ്ചരിച്ചിന്നീ നിമിഷത്തില്‍
അറിയുവാനൊട്ടു ത്വരയുണ്ടു, ചൊല്ലുവാ-
നൊരുപാടു കൊച്ചു നിമിഷമെന്നോര്‍മ്മയില്‍


ശരിയാണ്... വാക്കുകള്‍ മനസ്സിനെ കൊത്തി വലിക്കുന്നുണ്ട്.


ജ്യോതിര്‍മയം ഇവിടെ


© ജയകൃഷ്ണന്‍ കാവാലം

7 comments:

ശ്രീ said...

ജ്യോതിര്‍മയം ഇടയ്ക്ക് സന്ദര്‍ശിയ്ക്കാറുണ്ട്.

തുടരട്ടെ മാഷേ... ആശംസകള്‍!

ചാണക്യന്‍ said...

തുടരട്ടെ മാഷേ... ആശംസകള്‍!

Mr. X said...

Hi Jayakrishnan,

I would like to "refer" a blogger, Kuttan Gopurathinkal to you. If you like his posts, I am sure your blog can introduce more visitors to his posts, all of which are of good quality.

പാവപ്പെട്ടവൻ said...

തികച്ചും ആവിശ്യമായ ഒരു ബ്ലോഗാണ് ഇത് .എഴുത്തുകാര്‍ക്ക് പ്രോത്സാഹന പരമായ സാഹചര്യങ്ങള്‍ ഒരുക്കുന്നതിന് ഈ ബ്ലോഗിനു കഴിയും എന്ന് പ്രത്യാശിക്കുന്നു .
വളരെ നല്ല ആശംസകള്‍

jyothi said...

നന്ദി ജയക്രിഷ്ണന്‍, ആശംസകള്‍ നേരുന്നു.....

jyothi said...

നന്ദി ജയക്രിഷ്ണന്‍, ആശംസകള്‍ നേരുന്നു.....

jyothi said...

നന്ദി ജയക്രിഷ്ണന്‍, ആശംസകള്‍ നേരുന്നു.....